Te whakakore i te pōharatanga Ka miramira Te Kāhui mā te rangahau, te mātauranga, te hapahapai hoki, i ngā tika tangata me ngā āhuatanga Tiriti o te pōharatanga, ā, ka tuku i ngā tūtohu, i ngā māramatanga hoki e whaitake ana, kua poua ki ngā tika tangata, ki te Tiriti, ka taea hoki te whakatinana, kia whakahekea, kia whakakorea te pōharatanga ki Aotearoa. Kei ngā tāngata whenua he wheako pōharatanga ahurei ki Aotearoa, nā te mea i tangohia te 95% o ō rātou rawa e te kāwanatanga, me te aha kua tukaunga rātou i ngā hātepe o te tāmitanga. Te take Ka hangaia e te wheako o te pōharatanga ngā ārai tūturu ki te whakaurunga pāpori me te whakamahinga o ngā tika tāngata mō ngā tāngata takitahi, mō ngā hapori hoki. Ki tā mātou tūhononga hunga whai pānga nō waho, nā te 50 ōrau o ngā kaiwhakahoki i whakarārangi i te tika ki te paerewa rawaka kau o te noho hei tētahi o ō rātou take nui e toru. He take tika tangata, Tiriti hoki te pōharatanga. Kei te whakararu ia i te whakatinanatanga o ērā atu tika, tae atu ki te tika ki te whare rawaka, te āheinga ki te tiaki hauora me te whakahaumarutanga, te whakaurunga ki te ao ahurea, te āheinga ōrite ki te manatika, te tika ki te mātauranga, te tika ki te matatapu, me te tika ki te whakatā me te mahi rēhia. I tangohia e te kāwanatanga te mana, te whenua, ngā rawa hoki i ngā tāngata whenua hei painga mōna ake, mō ngā tāngata whai, ā, i waihotia ngā tini tāngata whenua ki te pōharatanga, te rawakore māteatea whakawhiti reanga. Ka kitea noatia e ngā hapori e whakataumahatia ana ngā taumata teitei ake o te taihara me te tūkino i ngā hapori whai rawa ake. Ngā mahi kokoti Ka whai Te Kāhui Tika Tangata i te aronga pūtake Tiriti, tika tangata hoki ki te whakakore i te pōharatanga: Tino rangatiratanga • Te whakahaere rangahau e miramira ana i ngā āhuatanga tika tangata me te Tiriti o te pōharatanga, tae atu ki te pānga o te tāmitanga ki ngā tāngata whenua • Te whakarato mātauranga, hapahapai me te tohutohu kia whakaheke i te pōharatanga mā ngā tāngata whenua • Mā te mahi tahi ki ngā tāngata whenua, ka whakawhanake me te tuari aratohu me ngā taputapu ka taea te whakamahi ki te whakatutuki i ngā take me ngā pānga o te pōharatanga mā ngā tāngata whenua • Te uiui ki me te pūrongo i tā te hunga kawe haepapa ekenga ki te whakatutuki i ngā take me ngā pānga o te pōharatanga mā ngā tāngata whenua • Te whakarato i te tohutohu rautaki pai ki ngā take pūnahanaha e hāngai ana ki te pōharatanga – he mea hohe, he mea tono rānei – hei tautoko i ngā tāngata whenua ki te whakamahi i te tino rangatiratanga me te mana motuhake • Te whakarato i tētahi ratonga whakatau tohe pai, me te whakakanohitanga ā-ture ki raro i te Human Rights Act 1993 33 | Mahere Rautaki 2021-2025 Kāwanatanga • Te whakahaere rangahau e miramira ana i ngā āhuatanga tika tangata me te Tiriti o te pōharatanga • Te whakarato mātauranga, hapahapai me te tohutohu e whai ana kia whakapiki mōhiotanga he take tika tangata te pōharatanga, ā, ka pēhea ngā tika tangata e āwhina ai i ngā mahi ki te whakaheke i te pōharatanga • Mā te mahi tahi ki ngā hapori, ka whakawhanake me te tuari aratohu me ngā taputapu ka taea te whakamahi ki te whakatutuki i ngā take me ngā pānga o te pōharatanga mā ngā tāngata takitahi me ngā hapori • Te uiui ki me te pūrongo i tā te hunga kawe haepapa ekenga ki te whakatutuki i ngā take me ngā pānga o te pōharatanga mā ngā tāngata takitahi me ngā hapori • Te whakarato i te tohutohu rautaki pai ki ngā take pūnahanaha e hāngai ana ki te pōharatanga – he mea hohe, he mea tono rānei – hei tautoko i ngā tāngata whenua ki te whakamahi i te tino rangatiratanga me te mana motuhake • Te whakarato i tētahi ratonga whakatau tohe pai, me te whakakanohitanga ā-ture ki raro i te Human Rights Act 1993