Human Rights Commission Tā mātou pou tarāwaho Tiriti e whanake haere ana Hei Whakahaere Tika Tangata ā-Motu, hei TBO hoki e whai ana mātou hei whakarite ko ngā atikara katoa o Te Tiriti ka whakaūngia ki roto i ngā mahi o ia rā a Te Kāhui. Kei te whakapakari ngā kōrero i raro nei i te pou tarāwaho Tiriti i whakaaetia e te National Iwi Chairs Forum. Hei whakarāpopoto ko te tikanga o tēnei ko: Atikara 1: Te Kāwanatanga me te Ngātahitanga Te whakarite kia mahi te Karauna ki te ngātahitanga tūturu, whakaute tētahi ki tētahi ki ngā Tāngata Whenua ki ngā taumata katoa o te whakahaere, kia tautoko i te whakarite whakatau, kia whakauru hoki i ngā tikanga, i te mātauranga. Atikara 2: Te Tino Rangatiratanga Te whakarite kia tūtohutia, kia whakautetia, kia haumarutia te mana o ngā Tāngata Whenua hei momo mana ki te taha o te kāwanatanga e mahi ana ki te ngātahitanga tūturu. Atikara 3: Te Ōritetanga Te whakarite kia uru ngā whānau ki te pāpori hei hunga ōrite horekau te toihara, ā, ka puretumu i ngā rerekētanga; ka hiahiatia e tēnei te whakahaumaru hohe o ngā pānga Tāngata Whenua ki ngā mahi katoa o Te Kāhui, e whakarite ana kia whakakorea te aronga ehara i te tika, ehara i te matatika, me te whai i te ōritetanga. 13 | Mahere Rautaki 2021-2025 Atikara 4: Ngā Ritenga Te whakahaumaru hohe i ngā whakapono, i ngā uara Māori mā te whakarite i te whakaurunga, i te āhukahuka, i te whakaute mō Te Ao Māori (ngā tirohanga ā-ao a te Māori), tae atu ki ngā tikanga, ngā kawa, ngā reo, ngā mātauranga Māori hoki ki te katoa o ngā tohutohu, ngā tātaritanga, ngā kaupapa here, ngā whakatau hoki. Ka hiahiatia e ngā takahitanga auau, taumaha hoki o te Tiriti o Waitangi kia tūtohutia, kia aronuihia ngā hē me te aro ki ngā hātepe o te pono, o te manatika, o te noho tahi, ā, tae atu ki te whakarauora i ngā taonga. E kī ana mātou kua whakamahia e ētahi atu whenua ngā hātepe whakawhiti, ā, ki ō mātou whakaaro ka taea te whakahāngai pai ki Aotearoa.