Regula Ita-Boot nia tempu eventu tuir jornalista sira-nia data-limite: Jornalista sira iha
oráriu loroloron nian ne’ebé okupadu, nune’e, regula iha neon Ita-Boot nia konferénsia mídia
tuir sira-nia data-limite sira. Tempu di’akliu atu konvoka konferénsia mídia ein-jerál mak
dadeer, maizumenus tuku 10 to’o tuku 11. Ida-ne’e sei fó tempu barak ba jornalista sira atu
rekolle entrevista ka informasaun sira seluk ne’ebé sira presiza hodi prepara sira-nia relatu
sira. Tau atensaun ba kualkér eventu konkorrente, anúnsiu ka ferias ruma ne’ebé bele
prevene jornalista sira atu partisipa iha Ita-Boot nia konferénsia mídia.
Fó-hatene uluk lai ba jornalista sira: Distribui nota alerta/avizu mídia ida loron hirak
antezde konvoka konferénsia mídia, karik sirkunstánsia sira admite. Inklui data, oras/tempu
no pontu-enkontru (fatin) husi konferénsia mídia, no mós vizaun jerál ida kona-ba relatu ne’e
no aprezentadór xave sira – maibé lalika fó barak liután.
Kontakta kanál mídia sira hodi uniformiza sira-nia interese: Keta supoin (hanoin) katak
editór sira notísias nian no jornalista sira hatene kona-ba Ita-Boot nia konferénsia mídia
simplesmente tanba Ita-Boot haruka ona alerta mídia ba sira. Sira bele ho fasil la fó
atensaun ba avizu ne’e tanba sira okupadu tebes iha estúdiu (sala-redasaun). Iha dadeer
molok atu konvoka konferénsia mídia, kontakta meza notísias husi kada kanál mídia no husu
seráke sira iha ona detalle (pormenór) sira husi konferénsia mídia iha sira-nia “diáriu” ka lae.
Karik seidauk, maka haruka kedas informasaun ne’e ba sira.
Prepara materiál sira mídia nian: Prepara materiál sira mídia nian hodi fornese ba
jornalista sira ne’ebé partisipa. Materiál sira-ne’e inklui kópia husi komunikadu mídia,
diskursu sira ruma ne’ebé prepara tiha ona atu hato’o, estudu-kazu sira, estatístika no karik
disponivel, USB drive ida ho fotografia no vídeo sira ho kualidade aas. Ninia objetivu mak atu
fornese ba jornalista sira informasaun no rekursus estra kona-ba asuntu xave sira. Asegura
atu Ita-Boot iha materiál mídia barak hodi antesipa karik númeru jornalista sira barak liu duké
ita espera.
Prepara lista asinatura tama nian iha odamatan: Lista asinatura tama nian sei ajuda ItaBoot hodi akompaña jornalista sira ne’ebé mak partisipa iha konferénsia mídia no sá kanál
mídia sira mak jornalista sira-ne’e reprezenta. Ita-Boot bele depois trasa kobertura ne’ebé
Ita-Boot simu iha kada kanál mídia hirak ne’e no aumenta jornalista sira-ne’e ba Ita-Boot nia
lista kontaktu mídia nian.
Husu ajuda ba loron eventu ne’e: Iha buat barak mak tenke organiza iha dadeer ba
konferénsia mídia ne’e. Ita-Boot dala ruma presiza ajuda hosi funsionáriu sira seluk prepara
fatin, fahe materiál sira, organiza lista asinatura tama nian, tuur-fatin ba bainaka sira no taumatan ba arranju sira ikusliu nian. Karik konferénsia mídia ne’e besik atu hahú ona no iha
kadeira balu mak sei mamuk hela iha sala laran, entaun husu INDU nia funsionáriu sira atu
partisipa iha audiénsia.
Fó tempu ba entrevista sira: Jornalista balu hakarak atu organiza entrevista frente-hofrente ho Ita-Boot nia portavós. Organiza tempu ba entrevista sira-ne’e depoizde konferénsia
mídia ne’e remata ona. Organiza atu iha fatin kalmu ne’ebé disponivel hodi bele hala’o
entrevista sira-ne’e.
Halo segimentu ho jornalista sira: Agradese jornalista sira ba sira-nia partisipasaun no
haree keta sira presiza informasaun adisionál ruma. Ita-Boot dala ruma hakarak atu hato’o
komunikadu imprensa ka materiál sira mídia nian liuhosi email ba jornalista sira ne’ebé laiha
posibilidade atu partisipa.
Matadalan Mídia ba Instituisaun Nasionál sira Direitus Umanus nian
33