Sāmoa e, o le agaga fa’anoanoa, peita’i, e iai fo’i le fa’amoemoe, ou te fa’atāla’u’ula atu ai ma tu’uina atu i le Palemene lenei Līpoti o le Sā’ili’iliga Lautele i Sāuāga i Totonu o ‘Āiga i Samoa (Sā’ili’iliga). O le fa’anoanoaga, ona o molimau na tu’uina mai i le taimi o le Sā’ili’iliga, e uiga i le mata’utia o sāuāga i totonu o ‘āiga ‘olo’o pagātia ai o tatou tagata, fa’apea le telē o le fa’afītāuli ‘olo’o o tatou feagai nei. Peita’i, ‘olo’o iai fo’i le fa’amoemoe ma le lototele, e āfua mai i fofō ua fa’atūina mai, e fa’atino ma galulue fa’atasi ma lo tatou Fa’atuatua, la tatou Aganu’u, fa’apea Aiā Tatau a Tagata Soifua, e mafai ai ona o tatou fa’afetaia’ia lenei gasegase ua pepesi i totonu o lo tatou atunu’u, le gasegase lea o sāuāga i totonu o ‘āiga. Ua laualuga i a tatou tala fa’asalalau tala o sāuāga i totonu o ‘āiga fa’apea le matā’upu lautele o sāuāga, ma na manino ai i lo’u Ofisa, ua tatau ona fa’atino se galuega i lenei matā’upu. Ua tele taumafaiga, ua tele fo’i polokalame ua fa’atino i lenei matā’upu ma ‘olo’o fa’aauau pea. Peita’i, e fōliga mai ua lē gata ina lē muta lenei fa’afītāuli, a ua fa’ateteleina. E pei ona ‘ole’ā taga’i i ai, e fou le ‘auala na filifilia mo le Sā’ili’iliga, ma ua mafai lea ‘auala e le Ofisa nei i lalo o ona mālosi’aga ua tu’uina mai e le Palemene. O sāuāga i totonu o ‘āiga, e lafi i tua o le pupuni o le lē gaganaina. E tatau lā ona ‘ave’ese lea pupuni, ina ia mafai ona fai se talanoaga a le atunu’u – e fa’aleoina ai tala mai tulimanu uma o lo tatou atunu’u, ina ia ‘āto’atoa lo tatou mālamalamaga i le fa’afītāuli, ma tu’uina atu le avanoa i o tatou tagata e tu’uina mai ai ni fautuaga mo ni fofō e fō’ia ai. Na fuafua le Sā’ili’iliga ina ia maua e tagata uma, mai Lalomanu i Falealupo, o le taulaga ma nu’u i tua atu, le avanoa e ‘auai ma fa’aleo o latou sao. E tusa ai ma lea fuafuaga, na fa’apea ona āu aso, vaiaso ma masina o o matou malaga ta’amilo i Sāmoa ma Komesina o le Sā’ili’iliga ma le ‘aufaigaluega o le Sā’ili’iliga, ina ia maua avanoa e fa’aleo ai finagalo o le atunu’u ma o lenei Līpoti, o le taunu’uga lea o lenei vaega. Peita’i, e lē o le i’uga lea o le galuega. O le taimi lenei o galuega fa’atino. E tofu i tatou uma ma le sao. E mana’omia le faitauina o lenei Līpoti ina ia fa’alautele le mālamalamaga e uiga i sāuāga i totonu o ‘āiga, ina ia mafai ai ona fa’atino o tatou sao ta’ito’atasi e fa’afetaia’i lenei fa’afītāuli ua feagai nei ma lo tatou atunu’u. O le ‘āmataga o lenei Sā’ili’iliga, na o matou tāpena ma le ‘aufaigaluega ina ia fetāla’i manatu e uiga i ni māfua’aga ma ni fofō e ono mafai. Ou te tatalo atu fo’i ina ia fa’apēnā o outou finagalo i le faitauina o lenei Līpoti. E iai ni taunu’uga e ono lu’iina ai o outou talitonuga o le sa’o, ‘ae mana’omia lo tatou talia o le meatonu, ua lē mafai e a tatou ‘auala ‘olo’o iai nei ona fō’ia le fa’afītāuli. ‘Olo’o tupu ma lauolaola sāuāga i totonu o ‘āiga, ma e tatau ona o tatou talia ‘olo’o tupu, ona fa’ato’ā mafai lea ona o tatou fa’ato’ilaloina lenei fa’afītāuli. O la matou pitolā’au i lenei Līpoti, ua taumafai e tonu le fa’amauina o talanoaga, manatu, folasaga ma felafolafoa’iga na iai a o fa’agāsolo le Sā’ili’iliga. O se talanoaga e le’i tupu muamua i le atunu’u, ma