Na manino i fefa’asoaa’iga e mālamalama tagata i le tāua o le sa’olotoga ma le fa’aaliga o tāofi. Na fa’amati’e e i latou na ‘auai o le sa’olotoga ma le fa’aaliga o tāofi e mafai ai e tagata ta’ito’atasi ona:32     fa’aali lagona ma tāofi i matā’upu e a’afia ai nu’u ma afio’aga, fa’aali manatu ma māfaufauga i ni matā’upu tau ‘āiga ma lo latou manuia, fa’atupu ma fesoasoani i felafolafoa’iga, ma mālamalama tagata ma maua ai mālosi’aga talafeagai. E ui i lea tāua, e to’atele na fa’ailoa mai, ‘olo’o iai pea se lu’i tele, ‘aemaise lava i le fa’atinoga o ia sa’olotoga, talu ai tagata ua fa’atino o latou sa’olotoga o le fa’aaliga o tāofi e aunoa ma se manatu i tiute tau’ave e ō fa’atasi ma ia sa’olotoga.33 E fōliga mai ‘olo’o iai se talitonuga ta’atele o ni tagata, o ia sa’olotoga e mafai ai e so’o se tagata ona “fai so’o se tala e mana’o ai, i so’o se tagata, i so’o se auala e mana’o ai, i so’o se taimi e mana’o ai”. O se manatu matuā sesē lenei manatu. E leai se sa’olotoga fa’avae e sa’oloto ‘āto’atoa. O fa’amanuiaga o sa’olotoga o tagata ta’ito’atasi i so’o se atunu’u mālamalama, e fa’atapula’aina lea e aia tatau a isi tagata ia maua fa’amanuiaga o o latou fo’i sa’olotoga. So’o se aiā tatau fa’avae lava, e va’ava’alua ma le tiute tau’ave ia lē solia aiā tatau a isi tagata.34 E lē gata i le fa’atinoga e aunoa ma se fa’aeteete, e fōliga mai fo’i e la’iitiiti se mālamalamaga o tagata lautele i tapula’a ma le lautele e mafai ona fa’atino ai ia aiā tatau, fa’apea le tāua o māfua’aga ua fa’ata’atia ai ia tapula’a.35 E pei ona fa’amati’e i le ata o mulimuli mai, o le 11% o i latou na fesiligia i le su’esu’ega na fa’ailoa mai o le sa’olotoga o le fa’aaliga o tāofi e mafai ai e so’o se tagata ona fa’aali tāofi e leai ni tapula’a. O le lē fa’autauta i le fa’atinoga o le sa’olotoga o le fa’aaliga o tāofi, o se tasi lea o māfua’aga ‘autū o popōlega ma le tula’i mai o matā’upu e aofia ai le taufa’aleaga, solia o aiā tatau i mea e lē tatau ona fa’alaua’itele, ma le sesē o fa’amatalaga e līpotiina. Paita’i, ua fa’ailoa mai fo’i i le ata, o le 22% o i latou na fesiligia i le gāsologa o talanoaga i vaega patino na fa’ailoa mai, e mālamalama i tiute tau’ave e feso’ota’i ma nei sa’olotoga ma aiā tatau ma e iai tagata na fa’ailoa mai, e tatau ona fa’atino ia sa’olotoga ma aiā tatau i se auala e lē āfāina ai isi 36. E to’atele foi tagata na fa’ailoa mai, o le sa’olotoga ma le fa’aaliga o tāofi e mafai ai e tagata ta’ito’atasi ona fa’asoa atu o latou fa’afītāuli e aunoa ma se popole po o le fa’amasinoina (23%). E tele fo’i tagata na ‘auai i le su’esu’ega e leai se tali na tu’uina mai. O se tasi o māfua’aga o le lē iloa po o le lē mālamalama. 32 Fefa’asoaa’iga ma vaega patino ma fautuaga Upolu (Mati 2021) ma Savai’i (Aperila 2021). Fefa’asoaa’iga ma vaega patino ma fautuaga Upolu (Mati 2021) ma Savai’i (Aperila 2021). 34 Office of the Ombudsman NHRI Samoa, “Disentangling beliefs about freedom of opinion/expression”, Press Release (29 July 2020), https://ombudsman.gov.ws/wp-content/uploads/2020/07/PRESS-STATEMENT_-NHRI-freedom-of-speech-FINAL-version-29-july.pdf. 35 SLRC folasaga tusitusia. Fefa’asoaa’iga ma vaega patino ma fautuaga Upolu (Mati 2021) ma Savai’i (Aperila 2021). 36 Fefa’asoaa’iga ma vaega patino ma fautuaga Upolu (Mati 2021) ma Savai’i (Aperila 2021). 33 Līpoti o le Tulaga o Aiā Tatau a Tagata Soifua 2021 | 15