18 Komesina o Sulufaiga (Ombudsman) 2013, Nu. 12 (2) E lē tatau ona fesiligia, iloiloina, soloia se taualumaga po o se faaiuga a le Komesina o Sulufaiga, pe taofia mo le fesiligia ai o se mataupu i totonu o se faamasinoga. 32. Ia lē tuuina atu e le Komesina o Sulufaiga se faamatalaga molimau-(1) E lē tatau i le Komesina o Sulufaiga po o se sui o le aufaigaluega ona valaauina mo le tuuina atu o se faamatalaga molimau i se faamasinoga, po o i totonu o so o se taualumaga e i ai sona uiga faa-faamasinoga, mo so o se mea ua ia iloa i le faatinoina ai o se galuega tauave, tiute po o malosiaga i lalo o lenei Vaega. (2) So o se mea ua taua po o so o se faamatalaga ua tuuina atu po o so o se pepa aloaia po o se mea ua tuuina atu e so o se tagata i se suesuega po o se taualumaga i luma o le Komesina o Sulufaiga i lalo o lenei Vaega, e i ai le tulaga aloaia tutusa i se suesuega po o se taualumaga i totonu o se faamasinoga. (3) O se lipoti ua faia e le Komesina o Sulufaiga i lalo o lenei vaega ua avea ma lipoti aloaia ua faia e se tagata o lo o faia se suesuega i lalo o le pule faataga a le Fono Aoao Faitulafono. VAEGA 4 AIA TATAU A TAGATA SOIFUA Vaevaega 1 - Galuega tauave 33. Galuega tauave - Ua i ai i le Komesina o Sulufaiga galuega tauave e uiga i aia tatau a tagata soifua e faapea: (a) ia uunaia le silafia o tagata lautele e uiga i aia tatau a tagata soifua ma ni taumafaiga e foia ai faiga uma faailoga tagata po o faiga tauvalea e ala i le tuuina atu o se faamatalaga ma aoaoga; (b) ia suesueina i, ma lipoti i luga o so o se tuuaiga o le solia o aia tatau a tagata soifua; (c) ia mataituina ma uunaia le tausisia o tulafono i aia tatau a tagata soifua faava o malo ma le atunuu e aofia ai le ala atu i so o se faiga ua taua e faapea -