          O le sa’olotoga o le fa’aaliga o tāofi o se vaega tāua o fa’amanuiaga ma le fa’atinoga o isi aiā tatau e aofia ai le aiā tatau o le ‘auai i matā’upu faitele, e aofia ai le aiā tatau e pālota. O le sa’olotoga o le fa’aaliga o tāofi e mafai ai e tagata ona fa’aali o latou lagona ma manatu e o’o atu ai i lagona ma manatu e ono fa’ate’ia, fa’aatuatuvale pe matuā a’afia ai talitonuga maua’a o isi ma tete’e pe mātuiā faitioga o faiga fa’avae po o galuega a le Mālō. E mana’omia le sa’olotoga o auala o fa’asalalauga mo le fa’agāoioiga o faiga fa’atemokarasi ma ‘olo’o puipuia lea sa’olotoga i lalo o lo tatou Fa’avae ma e tele lava ina āmana’ia i lona fa’atinoga. E ui ina mana’omia le sa’olotoga o auala o fa’asalalauga mo le fa’agāoioiga o faiga fa’atemokarasi, e tāua fo’i le mautinoa e tagata lautele, o auala o fa’asalalauga, o se auala e maua ai fa’amatalaga fa’atuatuaina ma moni. E ō fa’atasi le sa’olotoga o le fa’aaliga o tāofi ma fa’amatalaga, ma le sa’olotoga o le ‘au fa’asalalau ma fa’asalalauga. O lea tulaga e mafai ai ona aofia leo o tagata uma, e aofia ai i latou e lē masani ona amana’ia, ma mafai ai ona ‘auai tagata i fa’agāsologa o faigā fa’ai’uga. O le fa’atonutonuina o auala o fa’asalalauga e iai fa’avae tatau ma tonu e fa’atino ai, ae lē so’ona faia e tāofiofi ai ala o fa’asalalauga po o le tāofia o fa’amatalaga e tatau ona iloa e tagata lautele. O ni taumafaiga e tāofiofi pe fa’atapula’a le fa’aaogāina e tagata o le initaneti, mai se va’aiga tau aiā tatau a tagata soifua, e tatau ona pāleni le taga’i i tafa uma, ina ia mautinoa e matuā mana’omia ma alagātatau se tāofiofiga. O le matāfaioi a Mālō ‘Auai le fa’aavanoa o fa’amatalaga a le Mālō mo tagata lautele ina ia tino mai la latou aiā tatau i le mauaina o fa’amatalaga. O le aiā tatau i le mauaina o fa’amatalaga ma le iloa, o ni vaega mana’omia ia mo le ātīna’ega o se sosaiete e mafai ona maua e tagata uma fa’amatalaga. E lē gata ina ātīna’e ai tagata ta’ito’atasi ia maua mālosi’aga talafeagai e fai ai fa’ai’uga lelei, ae ‘ole’ā mafai ai fo’i ona fa’atino a latou aiā tatau, ‘auai i galuega tau le tamāo’āiga, a’oa’oina i ni tomai fou, ma mātauina galuega ma fa’atinoga a o latou mālō. O le puipuiga o tagata e fa’ailoaina ni solitulafono, e lē gata ina lagolagoina le aiā tatau i le sa’olotoga o le tautala ma le fa’aaliga o tāofi fa’apea le aiā tatau i fa’amatalaga tau le manuia o tagata lautele, ae fa’apea fo’i ona lagolagoina ai pulega lelei ma aogā lelei. Līpoti o le Tulaga o Aiā Tatau a Tagata Soifua 2021 |3