I’UGA 3 O LE SĀ’ILI’ILIGA: O Sāuāga i Totonu o ‘Āiga ua toeitiiti lava a’afia ai ‘āiga uma i Sāmoa, fa’atasi ai ma le to’atele o tagata ua o’o i ai sāuāga mātuiā i o latou ōlaga: • • • • • • Toeitiiti lava 9 mai se to’a 10 tagata ua o’o i ai sāuāga o le tino po o le māfaufau i totonu o o latou lava ‘āiga; O le to’atele o tama’ita’i (6 mai se to’a 10) ua o’o i ai sāuāga e fa’atino e se pā’aga vāvālalata; Toeitiiti lava tutusa le ta’atele o sāuāga mai se tagata e lē se pā’aga vāvālalata ma le ta’atele o sāuāga mai pā’aga vāvālalata; Ua o’o atu i le 1 mai se to’a 5 tama’ita’i ua tosoina; Ua o’o atu ina māsani tagata i sāuāga, ua fa’apea ai ona māsani i le pō, a’a, tatu’i, palauvale po o le taufa’amata’u ma e leai se manatu e mamafa ia faiga pe aofia fo’i i le uiga o sāuāga; O sāuāga i totonu o ‘āiga ua māliliu ai tagata ma ua mālepelepe ai ‘āiga. I’UGA 4 O LE SĀ’ILI’ILIGA: E matuā la’iitiiti lava se mālamalamaga i sāuāga fa’asaga i ni vaega patino e pei o tagata e iai mana’oga fa’apitoa, tagata ua matua le soifua, fa’afāfine ma tagata e ‘ese lagona tau itūpā mai fa’atulagaga māsani. O fa’amatalaga māua e fōliga mai ai e mafai ona ta’atele sāuāga ma e mana’omia le iai o ni fesoasoani talafeagai mo nei vaega. I’UGA 6 O LE SĀ’ILI’ILIGA: O a’afiaga mai sāuāga i totonu o ‘āiga e fa’ateleina ai le lamatiaga o le ‘avea o se tasi e āfāina i sāuāga, po o se fa’atino sāuāga i le lumana’i. I’UGA 7 O LE SĀ’ILI’ILIGA: O le tau mo le tamāo’āiga o Sāmoa o sāuāga i totonu o ‘āiga e mafai ona lē itiiti ifo i le ST$98m - $132m i le tausaga (6 – 7% o le tamāo’āiga o Sāmoa). I’UGA 8 O LE SĀ’ILI’ILIGA: O sāuāga i totonu o ‘āiga ua lautele ai soliga o le Fa’asāmoa, Talitonuga Fa’alefa’atuatua ma aiā tatau a tagata soifua. I’UGA 9 O LE SĀ’ILI’ILIGA: E tutusa a’a, agatausili ma talitonuga fa’avae o le Fa’asāmoa, Talitonuga Fa’alefa’atuatua ma aiā tatau a tagata soifua. E tofu i latou ma ‘auala e puipuia ai le taunu’uga fa’amoemoeina e tasi ‘olo’o o latou naunau uma i ai, ma o le fa’aopoopoina o le mālosi o le tasi, e fa’apea ona fa’aopoopoina ai le mālosi o isi. I’UGA 28 O LE SĀ’ILI’ILIGA: O le lē lava o le fa’amāoni o le Mālō ma ana fa’atinoga, e ala i le lē lava o puna’oa, lagolago ma le lē māopoopo o taumafaiga, e ‘avatu ai i tagata se fe’au, e talia le tulaga lē tutusa o itūpā, ma e talia sāuāga i totonu o ‘āiga. I’UGA 50 O LE SĀ’ILI’ILIGA: Talu ai le uiga fa’ata’amilo o sāuāga i totonu o ‘āiga, na’o le tasi lava le ‘auala e fa’afetaia’i ai ma fa’aitiitia lona ta’atele. O le fa’atupuina lea o se ‘auala e matuā tē’ena ma lē talia ai so’o se itū’āiga o sāuāga i totonu o le atunu’u.