2013, Nu. 12 Komesina o Sulufaiga (Ombudsman) 29 52. Tuuina atu o malosiaga-(1) E mafai e le Komesina o Sulufaiga ona tuuina atu i se sui o le aufaigaluega so o se tasi o galuega tauave, tiute ma malosiaga o le Komesina o Sulufaiga, i lalo o lenei Tulafono (“tuuina atu o malosiaga”) seia vagana ai lenei tuuina atu o malosiaga ma le malosiaga e faia ai so o se lipoti i lalo o lenei Tulafono. (2) O se malosiaga tuuina atu: (a) e mafai ona faia i se sui o le aufaigaluega po o se tofi po o se vasega o le aufaigaluega po o tofiga; (b) e mafai ona faia i se mataupu po o se vasega o mataupu; (c) e mafai ona noatia ma fai fuafua i tuutuuga; (d) e lē taofia ai le tauaveina o galuega tauave, tiute po o malosiaga ua tuuina atu e le Komesina o Sulufaiga; (e) e mafai ona teuteuina, faataatia ese, pe faalēaogāina; (f) e faaauau pea seia vagana ua faalēaogāina; (g) afai ua lē toe umia e le Komesina o Sulufaiga o le tofi, e faaauau pea e peiseai o le tuuina atu o malosiaga sa faia e le tagata ua soloae ane i ai. (3) E tatau i se tagata ua faamoemoe e faatino o se malosiaga tuuina atu, pe a i ai se taimi e manaomia ai, ona tuuina atu le pule faataga o le tuuina atu o malosiaga. VAEGA 7 PULEGA MA TUPE Vaevaega 1 - Ofisa o le Komesina o Sulufaiga 53. Faavaeina-(1) O le Ofisa o le Komesina o Sulufaiga e faaauau pea i lalo o lenei fuaiupu, e aofia ai le: (a) Komesina o Sulufaiga; (b) toatasi (1) pe sili atu Komesina Lagolago o Sulufaiga; (c) tagata ofisa ma le aufaigaluega; (d) so o se isi lava tagata ua faafaigaluegaina e le Komesina o Sulufaiga mo le faamoemoe o lenei Tulafono.