20 Komesina o Sulufaiga (Ombudsman) 2013, Nu. 12 (g) ia feutagai, fesootai atu ma galulue faatasi ma isi faalapotopotoga faaleatunuu, faava o malo i aia tatau a tagata e manatu le Komesina o Sulufaiga ua talafeagai; (h) ia fautua atu i so o se mataupu ua tuuina atu i le Komesina o Sulufaiga e le Malo, e amanaia ai punaoa o lo o i ai ma tulaga faamuamua a le Komesina o Sulufaiga; (i) ia faia ma tuuina atu ni lipoti i so o se galuega tauave i lenei fuaiupu; (j) ia faia so o se mea e faaono tulai mai po o e aogā i le faatinoina o so o se galuega tauave i totonu o lenei fuaiupu po o le faatinoina o po o se matafaioi tau aia tatau a tagata soifua e tusa ai o lenei Tulafono. Vaevaega 2 - Suesuega 34. Fuafuaina o suesuega - Afai ua silafia e le Komesina o Sulufaiga ni tulaga ua faalauaiteleina, fuafuaina ma ua sili ona mautinoa po o ni faiga masani o lo o solia ai aia tatau a tagata, e mafai e le Komesina o Sulufaiga ona fuafuaina se suesuega. 35. E leai ni suesuega o mataupu o lo o i luma o faamasinoga - E lē mafai e le Komesina o Sulufaiga ona fuafuaina se suesuega o se mataupu o lo o noatia i so o se taualumaga o lo o talia i so o se faamasinoga, seia vagana ua tolopoina e le faamasinoga ni taualumaga i se itu ua lē talafeagai ai, ma ua faapea ona valaau ai mo le faia o lea tulaga i lalo o le fuaiupu 33(d). 36. Lipoti o suesuega-(1) Afai ua maua i se suesuega se faamatalaga molimau o le solia o aia tatau a tagata soifua, e mafai ona aofia ai i totonu o le lipoti so o se mea po o mea uma ua taua e faapea: (a) o le faaiuga e faapea ua solia aia tatau a tagata soifua ma e lē tatau ona toe faia po o le faaauauina;