Ua talanoaina i le Līpoti matā’upu tāua e feso’ota’i ma le sa’olotoga o manatu ma le fa’aaliga o tāofi. Ua talanoaina ai fo’i le aiā tatau i le mauaina o fa’amatalaga ma lona so’otaga i le mafai e tagatānu’u ona fa’aali o latou tāofi i matā’upu tāua. Ina ia mālamalama ātili i matā’upu ‘autū na lāgā i fefa’asoaa’iga, ua taga’i le Līpoti i tafa ‘ese’ese o ia aiā tatau ma sa’olotoga, e aofia ai le – taufa’aleaga; tala mapuna a’e i le ‘ino’ino; sa’olotoga o le fa’aaliga o tāofi ma aiā tatau tau upufai o mālō; sa’olotoga o le fa’aaliga o tāofi ma auala o fa’asalalauga; le initaneti, sa’olotoga o le fa’aaliga o tāofi, ma le saogalēmū o tamaiti i luga o le initaneti; aiā tatau i le mauaina o fa’amatalaga, ma le puipuiga o tagata e fa’ailoaina ni solitulafono. Ua taga’i fo’i le Līpoti i tulaga ‘ese’ese e mafai ai ona fa’aitiitia pe fa’atapula’aina nei sa’olotoga ma aiā tatau. Ua iai i le Līpoti ni fautuaga i matāgaluega ma ofisa o le Mālō e feso’ota’i, ina ia fa’amautinoa le fa’aauauina o le puipuiga ma le lagolagoina o nei aiā tatau ma sa’olotoga i Sāmoa. E tolu vaega ua fa’avasegaina i ai fautuaga: (1) ‘a’apa atu ma le silafia, (2) toefuata’iga o tulafono ma faiga fa’avae, (3) puna’oa ma le ātīna’ega o agava’a. Ua taumafai le Līpoti e fa’amati’e le tulaga o le sa’olotoga o manatu ma le fa’aaliga o tāofi i Sāmoa – le fa’atinoga, auala o puipuia ma lagolagoina ai, ma ni itū e mafai ona fa’aleleia ina ia āga’i pea i luma lo latou tino mai. Līpoti o le Tulaga o Aiā Tatau a Tagata Soifua 2021 |7