serbisu no hodi engaja ho efikás kona-ba kestaun sira-ne’ebé iha importánsia direta ba feto
no feto-oan sira-nia direitus.
Manuál ne’e kontein kapítulu hamutuk 12, ne’ebé hetan organiza iha parte haat.
Parte I introdús direitus umanus husi feto no feto-oan sira. Parte ne’e realsa dezafiu balu
hosi dezafiu barabarak ne’ebé feto no feto-oan sira hasoru no esplika tansá mak sira-nia
direitus ezije atensaun ketak no adisionál. Mós, parte ne’e esplika lei, mekanizmu no
prosedimentu internasionál xave sira-ne’ebé durante ne’e hetan dezenvolve ona hodi hadi’a
feto no feto-oan sira-nia direitus umanus.
Parte II konsidera meiu prátiku sira iha-ne’ebé INDU sira bele proteje no promove feto no
feto-oan sira-nia direitus umanus. Kapítulu sira-ne’e reflete INDU sira-nia funsaun prinsipál
sira, inklui: atu apoia enkuadramentu legál no polítiku nasionál ida-ne’ebé forte; atu responde
alegasaun sira kona-ba violasaun hasoru direitus umanus ne’ebé envolve feto no feto-oan
sira; atu hala’o inkéritu ba violasaun sistémiku sira hasoru direitus umanus; atu promove
sensibilizasaun no koñesimentu kona-ba direitus umanus; no atu engaja ho órgaun no
mekanizmu sira direitus umanus nian rejionál no internasionál.
Parte III ezamina ho detalle kestaun tolu ne’ebé hetan identifika ona nu’udar prioridade sira
ba INDU sira iha rejiaun Ázia-Pasífiku: direitus reprodutivu; violénsia hasoru feto sira; no
direitus husi traballadór nasionál migrante feto sira.
Parte IV konklui Manuál ne’e ho revizaun ida kona-ba meiu sira iha-ne’ebé INDU sira ho
efikás bele integra jéneru no feto no feto-oan sira-nia direitus umanus iha sira-nia aspetu
serbisu no prátika organizasionál oioin. Parte ne’e mós inklui diskusaun ida kona-ba oinsá
INDU sira bele ho efikás armoniza feto no feto-oan sira-nia direitus umanus iha sira-nia
atividade no programa jerál sira.
Manuál ne’e nia parte hotu-hotu realsa ezemplu sira kona prátika-di’ak ne’ebé foti hosi AFP
nia instituisaun membru sira. Kada kapítulu inklui pergunta xave sira, baze legál ba INDU
sira-nia envolvimentu no sumáriu ida kona-ba kestaun prinsipál sira.
Promove no Proteje Feto no Feto-oan sira-nia Direitus Umanus: Manuál ba Instituisaun Nasionál sira Direitus Umanus nian
14