‘ole’ā fa’apea ona fa’amauina. O i’uga ua matou fa’amauina ma Komesina o le Sā’ili’iliga, o i’uga uma e fa’avae i mau na tu’uina mai i le Sā’ili’iliga. Ua iloga le āga’i i luma o lo tatou atunu’u i le itū tau i le mafai ona talanoaina matā’upu fa’apenei ma e lē se la’asaga fa’atauva’a lea. Ua toeitiiti māe’a le taimi o le talanoa, ma o le fa’amoemoe, e māe’a ane le faitauina o lenei Līpoti, ua sāunia tagata uma e ‘auai i fa’atinoga. E matuā leai, leai lava se fesiligia e lo’u māfaufau po o lo’u loto, ‘auā ua ou mautinoa, ‘āfai e talia e tagata uma (e lē gata i o tatou sui i upufai o mālō, ta’ita’i fa’aleaganu’u ma ta’ita’i fa’alelotu, a o i tatou uma) i’uga ma fautuaga o lenei Līpoti, e lē gata ina mafai ona o tatou fa’ato’ilaloina sāuāga i totonu o ‘āiga ma isi sāuāga uma, ‘ae ‘ole’ā fa’apea ona mālosi ātili ai o tatou talitonuga fa’aleaganu’u fa’apea lo tatou Fa’atuatua. E lē mafai ona fa’ataunu’uina lenei Sāili’iliga pe ana lē seanoa le loto tetele o i latou uma na tūla’i mai ma fa’asoa mai, ma fofola mai o latou loto i mea na tutupu, i lo latou fa’amoemoe ma le talitonuga, o lo latou tūla’i mai, ‘ole’ā fa’apea ona tāofia ai le tutupu o nei puapuagā i ni isi tagata i le lumana’i. E matuā fa’afeagai le toa, loto tetele, le māua’i ma le fa’atuatua na fa’aalia e i latou uma na o’o i ai sāuāga, ma uiga o i latou na fa’atinoina sāuāga. O le māfua’aga lea ua tatau ai iā i tatou uma ona filigā ia maua lea agaga o le māua’i, ina ia ‘ave’esea le pupuni o le lē gaganaina o sāuāga i totonu o ‘āiga, ma fa’atino lo tatou sao i le tafi’eseina o lenei mala mai la tatou aganu’u.